நான் தி.மு.க தலைவராக இருந்தால்...

இன்றைய தினத்தில் நான் தி.மு.க தலைவராக இருக்கும் பட்சத்தில் கீழ்கண்ட நடவடிக்கைகளை அறிவித்திருப்பேன்...

1.கட்சியின் உள் கட்டமைப்புக்கு ஊறு விளைவிக்கும் வகையில் செயல்பட்டதால் சன் நெட்வொர்க் குழுமம் அன்னா அறிவாலயத்திலிருந்து செயல்படும் தார்மீக உரிமையை இழந்து விட்டது. எனவே உடனடியாக அறிவாலயத்திலிருந்து வெளியேற வேண்டும்..

2.கட்சிப் பணிகளில் இளைஞர்களை மேலும் தீவிரமாக ஈடுபடுத்தும் வகையில் மத்திய அமைச்சரவையில் சிறப்பாக செயல்பட்டு வரூம் திரு.தயாநிதிமாறன் கட்சி பணிகளுக்காக திரும்ப அழைக்கப்படுகிறார். அதன் காரணமாக அவர் தனது ராஜினாமா கடிதத்தினை பிரதமரிடம் சமர்ப்பிக்க கட்சி தலைமை கட்டளையிட்டிருக்கிறது.

3.மதுரையில் வன்முறையில் ஈடுபட்டதாக தெரியும் அனைத்து கழகத்தவர்களும் மறு அறிவிப்பு வரும் கட்சியிலிருந்து நீக்கி வைக்கப்படுகிறார்கள்.

4.திரு.அழகிரி நடந்த சம்பவங்களுக்கு தார்மீக பொறுப்பினையேற்று பாதிக்கப்பட்டவர்களிடம் வரூத்தம் தெரிவித்து தேவையான நஷ்டஈடுகளை செய்யவேண்டும். அதுவரை கட்சி கட்டுப்பாடுகளை மீறியதற்காகாஅவர் கட்சியில் இருந்து இடைநீக்க்கம் செய்யப்படுகிறார்.

இதை கலைஞர் செய்வாரா...?

நடந்த சம்பவங்கள் குறித்த அழகிரியின் பேட்டியாக தினமலர் தந்துள்ள செய்தி....

கருத்துக்கணிப்பு வெளியிட்ட ஜென்மங்கள் நேரில் வரட்டும்: மு.க. அழகிரி சவால்

மதுரை: கருத்துக்கணிப்பு வெளியிட்ட ஜென்மங்கள் நேரில் வரட்டும். யாருக்கு ஆதரவு என தெரிந்து கொள்ளட்டும் என முதல்வர் கருணாநிதி மகன் அழகிரி சவால் விடுத்தார்.
மதுரையில் நிருபர்களிடம் மு.க. அழகிரி கூறியதாவது: கருத்துக்கணிப்பு வெளிவந்த அந்த நாளிதழை நான் படிப்பதே இல்லை. தலைவர் (கருணாநிதி) மீது ஆணையாக இதை சொல்கிறேன். கருத்துக்கணிப்பு வெளியிட்ட "ஜென்மங்கள்' நேரில் வரட்டும். தமிழகம் முழுதும் அழைத்துச்செல்கிறேன். எனக்கு எவ்வளவு ஆதரவு, அந்த ஜென்மங்களுக்கு எவ்வளவு ஆதரவு என்பதை தெரிந்து கொள்ளட்டும். இதை யார் செய்தார்களோ அவர்கள் மீது தலைவர் நடவடிக்கை எடுக்கட்டும். ஏற்கனவே யாரோ தெரிவித்த தவறான தகவலின் அடிப்படையில் என் மீது நடவடிக்கை எடுத்தனர். அதே போல இப்போதும் நடவடிக்கை எடுக்க வேண்டும்.
நான் பதவிக்கு வர வேண்டும் என்ற எண்ணத்தில் இருந்தால் என்னை பற்றி கருத்துக்கணிப்பு எடுக்கலாம். கட்சிப் பதவியிலேயே நான் கிடையாது. இவ்வாறு இருக்கும் போது என் தம்பி (ஸ்டாலின்) இடத்திற்கு வரவேண்டும் என நான் எப்படி நினைப்பேன். கட்சிக்கு நல்லது செய்ய வேண்டும் என உழைக்கிறேன். எனவே கட்சி வளர்கிறது.
கருத்துக்கணிப்பை பார்த்து என் தம்பி என்னிடம் பேசி வருத்தப்பட்டார். அதை கண்டித்தார். தமிழ்ப் புத்தாண்டு அன்று தலைவரின் வாழ்த்துச் செய்தியை கூட அந்த நாளிதழ் வெளியிடவில்லை. நான் எதற்கும் ஆத்திரப்படவில்லை. பதவிக்கு வரவேண்டும் என்றும் எதிர்பார்க்கவில்லை. இந்த கருத்துக்கணிப்பை வெளியிட தேவையே இல்லை. இப்போது தேர்தலா வருகிறது? தேர்தல் நேரம் என்றால் நான் பதவிக்கு போட்டியிடுகிறேன் என்றால் கருத்துக்கணிப்பை வெளியிடலாம்.
"அவர்கள்' நிறைய பணம் வைத்துள்ளனர். பணத்தை வைத்து என்ன வேண்டுமானாலும் செய்யலாம், எதை வேண்டுமானாலும் வாங்கலாம் என நினைக்கின்றனர். அது தவறானது. தலைவருக்கு பொன்விழா நடக்க இருக்கும் இந்த நேரத்தில் அவருக்கு மனகசப்பையும், மனஉளைச்சலையும் ஏற்படுத்த வேண்டும் என்ற உள்நோக்கத்தில் கருத்துக்கணிப்பை வெளியிட்டுள்ளனர்.
பஸ்கள் மீது கல்வீச்சு நடந்தது பற்றி எனக்கு தகவல் இல்லை. அவர்களாகவே வேண்டும் என்றே இதை செய்திருக்கலாம். இவ்வாறு அழகிரி கூறினார்.